Rruga Librazhd-Përrenjas është hapur mesditën e kësaj të marte.
Autoriteti Rrugor Shqiptar (ARRSH) njoftoi se ky aks do të jetë i hapur për qarkullimin e mjeteve, përfshirë ato të tonazhit të rëndë, me kushtin që të respektohen kufizimet për ngarkesën.
Hapja e këtij aksi lehtëson qarkullimin dhe lidhjen e dy qyteteve, duke përmirësuar infrastrukturën në këtë zonë.
Njoftimi:
Sot, datë 03.03.2026, ora 12:00, rikthehet qarkullimi në aksin Librazhd–Prrenjas për të gjitha mjetet duke përfshirë edhe tonazhin e rëndë, por duke respektuar ngarkesën 8.2ton për aks.
Qarkullimi do të kryhet përmes një devijimi provizor, të ndërtuar ngjitur me pozicionin ekzistues të mëparshëm, deri në realizimin e plotë të rrugës alternative, tashmë të bërë publike, në shtratin e lumit Shkumbin dhe të integruar me trupin e hekurudhës.
Segmenti do të funksionojë me sinjalistikë kantieri dhe, përkohësisht, do të jetë i paasfaltuar deri në stabilizimin e shtresave, pas së cilës do të kryhet asfaltimi përfundimtar.
Duke kërkuar mirëkuptim nga të gjithë përdoruesit e rrugës si dhe banorëve të zonës, u bëjmë thirrje të respektojnë sinjalistikën dhe udhëzimet e Policisë Rrugore, për të garantuar një qarkullim të sigurt për të gjithë.
