Kryeminsitri Edi Rama publikoi pak ditë më parë nismën që do të ndërmarrë qeveria, duke pyetur qytetarët për çështje të rëndësishme për vendin.
Një nga pyetjet që Rama do t’u drejtojë qytetarëve, lidhet me masat që duhet të marrë qeveria kundër sipërmarrësve të mëdhenj që bëjnë evazion fiskal.
Duke pranuar se biznesi i madh bën më shumë evazion fiskal, kryeministri tha se nuk ndan të njëjtin mendim me ata që kërkojnë burgosjen e biznesmenëve të mëdhenj, pasi në fund të fundit, ata janë punëdhënës dhe jo gogolë.
“Janë jo pak, njerëzit që kërkojnë që biznesi i madh kur bën evazion të goditet pa mëshirë, që do të thotë ashpërsim i konsiderueshëm, qoftë i masave që çojnë deri në humbjen e lirisë së biznesmenëve. Biznesi madh është targetuar si një gogol, shfrytëzues. Por unë nuk e ndaj këtë pikëpamje, as atë që janë një grusht oligarkësh që vendosin”, u shpreh Rama.
I pyetur nëse do t’i pyeste qytetarët edhe në lidhje me PPP-të, Rama tha se ato janë instrumente të përdorura nga e gjithë bota.
“Nuk janë shfaqje të huaja dhe nuk kemi çfarë diskutojmë për këto koncepte dhe instrumente sepse jemi në një vend kapitalist. Dhe cila do të ishte pyetja? Është e vërtetë që shqiptarët paguajnë, por paguajnë për koncesionet e trashëguara, për ato gjatë qeverisjes sonë, i marrin shërbimet pa paguar, e bëjnë check-up-in falas, analizat laboratorike falas; për këto ka marrë përsipër të paguajë shteti. Shqiptarët sot bëjnë dializa në kushte ultra moderne pa paguar asnjë lek”, deklaroi ai.
