Një 35-vjeçar shqiptar ka rënë në prangat e policisë italiane pasi rrëmbeu djalin e tij.
Mediat italiane raportojnë se shqiptari, identiteti i të cilit nuk dihet, kishte shkuar në Mantova, për të takuar ish-gruan e tij, e cila pas ndarjes ishte transferuar aty verën e kaluar.
Duke përfituar nga mungesa e ish-bashkëshortes (motra e saj ishte në shtëpi) shqiptari mori djalin e tyre 2-vjeçar dhe u largua.
Fill pas kësaj ai mori në telefon ish-gruan dhe e kërcënoi atë se do të vriste djalin dhe më pas do të vetëvritej nëse gruaja nuk kthehej sërish me të. ‘Ansa’ shkruan se gruaja, e tmerruar, njoftoi policinë për ngjarjen dhe më pas i la takim ish-burrit të saj në dalje të autostradës në Albisola, ku aty i kishte ngritur edhe një kurth.
Ndërkohë, karabinierët bënë të mundur arrestimin e shqiptarit, i cili pritet që nesër të dalë para gjykatës nën akuzën e ‘përndjekjes’.
