Libia ka kundërshtuar planin e Bashkimit Europian për të ngritur atje qendrat e pritjes së emigrantëve dhe trajtimit të kërkesave të tyre për azil në vendet Perëndimore.
“Ne jemi absolutisht kundër Evropës që na kërkon zyrtarisht, që të strehojmë emigrantë ilegalë, që Bashkimi Europian nuk dëshiron t’i marrë”, deklaroi kryeministri libian për Bild.
Ai vijoi edhe më tej kritikat për Bashkimin Europian, duke e akuzuar se ka lënë Libinë të vetme në betejën për të shpëtuar emigrantët në detin Mesdhe.
“Anijet tona patrullojnë çdo ditë në detin Mesdhe, për të shpëtuar emigrantët, por ne jemi lënë të vetëm në këtë betejë. Libia ka nevojë për mbështetje njerëzore dhe financiare, që të përballojë fluksin e shpëtimit të emigrantëve”, tha lideri i Libisë.
Më herët, Agjencia e Kombeve të Bashkuara për Migrimin tha se 51,782 emigrantë dhe refugjatë hynë në Evropë nga deti deri më 18 korrik. Ky total krahasohet me 110,189 në këtë kohë të vitin e kaluar dhe 244,722 në këtë kohë në vitin 2016. Numri i të vdekurve deri më sot, për këtë vit është 1,490.
