Ish-kryeprokurori Adriatik Llalla po hetohet në Durrës dhe jo në Tiranë. Prokuroria e Krimeve të Rënda ka konfirmuar zyrtarisht për mediat se ky institucion, nuk ka asnjë procedim penal apo hetim ndaj ish-kryeprokurorit Adriatik Llalla. Lajmi është konfirmuar nga Laureta Binaj, koordinatore për mediat në Prokurorinë e Krimeve të Rënda.
Kështu lajmi që qarkulloi pak ditë më parë nga mediat pranë opozitës se dosja ishte transferuar në Tiranë rezulton i pavërtetë. E vetmja gjë që konfirmohet ështe se: Po. Adriatik Llalla është zyrtarisht nën hetim, nga Prokuroria në Durrës.
Ai po hetohet nga prokuroria e qytetit bregdetar për katër akuza, prej datës 15 mars. Hetimet për Llallën janë regjistruar për katër vepra të rënda penale: “Refuzim për deklarim, mosdeklarim, fshehje ose deklarimi i rremë i pasurisë, interesave private të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, “Mosdeklarim i shumave të të hollave përetj kufirit ligjor të lejuar, në kufi”, “Pastrimit të produkteve të veprës penale“ dhe “Shpërdorimit të detyrës”.
Në vitin e fundit të mandatit të tij, Llalla pati konflikt të hapur me ambasadorin e SHBA në Tiranë Donald Lu, duke e akuzuar këtë të fundit si person që kishte ndikuar tek ai për arrestimin e Ilir Metës dhe për mbylljen e një procedimi penal në Fier, që bënte fjalë për kompaninë e naftës “Bankers Petrolium”.
Nga ana tjetër Lu e ka quajtur Llallën si person të korruptuar dhe që ka dashur të pengojë reformën në drejtësi. Pas largimit të Llallës nga posti i kryeprokurorit, Departamenti i Shtetit ndaloi publikisht hyrjen e Adriatik Llallës dhe familjes së tij në Shtetet e Bashkuara, me argumentin se “ka informacione për përfshirje të tij në raste domethënëse korrupsioni”.
Nga ana e tij, Llalla reagoi në një media amerikane, duke thënë që “vendimi i Departamentit të Shtetit është marrë për shkak të keqinformimit me dashje që është bërë nga ambasadori Lu”. Ndërkohë që disa javë pas vendimit të Departamentit të Shtetit, Prokuroria e Durrësit nisi hetimi ndaj Adriatik Llallës, për disa vepra që lidhen me pastrimin e parave. Nga ana tjetër ndaj Llallës pritet të zhvillohet një hetim dhe gjykim administrativ nga Kolegji i Posaçëm i Apelimit ose shkalla e dytë e vettingut.
