Gjykata e Posaçme ka caktuar masën “arrest në burg” për specialistin e Kadastrës Dritan Stoka. Stoka u arrestua për korrupsion në zgjedhje.
Sipas SPAK, ai u premtonte qytetarëve kryesisht në zonën e Saukut, legalizim të banesave në këmbim të votave. Gjithashtu mësohet se ka ndryshuar masa e sigurisë për ish-kryeplakun e lagjes së re në Sauk, Agim Osmanin, nga “arrest në burg” në “arrest shtëpie”.
Edhe për ish-juristin e Kadastrës Alqi Hajdinin, gjykata ndryshoi masën e sigurisë, nga “arrest shtëpie” , kalon në hetim në gjendje të lirë. Ndërsa për Ylli Barutin nuk pati ndryshim mase dhe hetimet do të vijojnë në gjendje të lirë.
Kujtojmë se Dritan Stoka dhe Agim Osmani u arrestuan mbrëmjen e 26 prillit, për korrupsion zgjedhor gjatë zgjedhjeve vendore të vitit 2019.
Sipas hetimeve të SPAK, në atë kohë rezultoi se Dritan Stoka, dhe Agim Osmani, kanë kryer veprat penale “Ushtrimi i ndikimit të paligjshëm ndaj personave që ushtrojnë funksione publike” dhe “Korrupsioni aktiv në zgjedhje”.
Ata, në bashkëpunim me njëri-tjetrin, kanë kryer veprime aktive gjatë fushatës elektorale të zgjedhjeve vendore të vitit 2019, duke kërkuar nga persona të ndryshëm përgatitjen e listave të personave që do të merrnin pjesë në zgjedhje, duke i detyruar për të votuar ose përcaktuar mënyrën e votimit.
