Njësoj si shumë shtet te tjera të botës të prekur me koronavirus, edhe Gjermania vuan mungesën e maskave dhe mjeteve dezinfektuese. Megjithatë, ajo që të bën përshtypje, të paktën krahasuar me Shqipërinë, nuk ka pasur rritje çmimesh, përkundrazi. Një fakt të tillë e konfimon në një lidhje për Report Tv, shqiptarja në Gjermani, Kristiana Allkanjari e cila tha se javën e kaluar ka pasur ulje në dyqane për shkak të fluksit të madh.
“Nuk ka shumë panik, njerëzit janë orientuar nga ministria e shëndetësisë që të marrin ushqime dhe të rrinë në shtëpi. Ka produkte që janë mbaruar për shkak të fluksit në supermarkete. Maska shumë vështirë të gjenden dhe mjetet e dezinfektimit shumë vështirë të gjenden. Çmimet janë normalizuar, para një jave ka pasur ulje çmimesh se ka pasur shumë fluks”, u shpreh Allkanjari.
Ajo ka bërë një panoramim të gjitha masave të marra nga autoritetet gjermane, ku ndonëse janë konfirmuar 6000 raste dhe 13 viktima, vetëm disa ditë më parë janë mbyllur shkollat dhe kufijtë me disa shtete, teksa transporti publik vijon të funksionojë.
“Në Gjermani ka mbi 6000 raste, janë shtuar shumë shpejt, 13 të vdekur. Masat janë marrë së fundmi, nuk është se janë marrë shumë masa. Mbyllja e shkollave ka filluar së fundmi. Janë mbyllur kufijtë me disa shtete. Në Dortmund është vendi ku ka më shumë të infektuar. Testet nuk kryhen për të gjithë që kanë shenjat, është doktori që e vendos nëse ka pasur kontakt të drejtpërdrejtë me ndonjë të infektuar apo që vijnë nga vendet e prekura. Janë shtyrë operacionet e planifikuara, po kujdesen më shumë për të moshuarit”, tha Allkanjari për Report Tv.
