Një vaksinë kundër Covid-19 nuk siguron mbrojtje të plotë ose të menjëhershme ndaj virusit, që do të thotë se ka ende mundësi që ju të infektoheni. Raste të ngjashme kanë ndodhur në të gjithë botën. Mund të dilni pozitiv madje edhe pasi të merrni dozën e dytë të vaksinës. Kjo ndodh për disa arsye, të cilat i sjell “CNN”.
Vaksinimi dhe mbrojtja nuk ndodhin menjëherë.
Duhen disa ditë deri në disa javë që vaksina të funksionojë. Duhet pak kohë që trupi të zhvillojë imunitet. Doza e parë mund të sigurojë një farë mbrojtje, por siç tha të hënën CEO i Moderna, Stephane Bancel ” ne nuk kemi ndonjë të dhënë të saktë në lidhje me këtë”. Për Pfizer, pas 14 ditësh doza e parë ishte rreth 52% efektive në parandalimin e sëmundjes.
Vaksinimi nuk ka efektivitet të plotë
Ju përsëri mund të dilni pozitiv pasi të vaksinoheni pasi vaksina nuk është 100% efektive. Të dyja vaksinat e autorizuara nga SH.B.A. janë shumë efektive, por ato nuk ofrojnë mbrojtje totale. Vaksina Pfizer ishte 95% efektive në parandalimin e sëmundjes në provat klinike pasi njerëzit morën dy doza. Vaksina Moderna ishte 94% efektive në parandalimin e sëmundjes tek njerëzit që morën dy doza në provat klinike.
Vaksinimi parandalon sëmundjen por jo infeksionin.
Vaksinimi parandalon sëmundjen, por është ende e paqartë nëse vaksina parandalon të gjitha infeksionet. Mund të ndodhë që ne të infektohemi por të mos kemi simptoma. Vaksina jo vetëm që parandalon sëmundjen por edhe ashpërsinë e saj. Edhe nëse keni simptoma, do të jenë më pak të rënda sesa simptomat e njerëzve të pavaksinuar. Nëse jeni asimptomatik, përsëri do të dilni pozitiv me Covid-19. Kjo do të thotë se nëse jeni të vaksinuar, ju përsëri mund të përhapni sëmundjen. Kjo është arsyeja pse edhe të vaksinuarit duhet të mbajnë maska.
Vaksina mund të mos jetë efektive ndaj të gjitha varianteve të reja.
Prodhuesit e vaksinave Covid-19 po bëjnë testime për të parë nëse vaksinat funksionojnë kundër varianteve të reja. Mund të lindë nevoja që të krijohen përforcues për vaksinën Covid.
