9 persona të tjerë janë shëruar nga COVID-19 ditën e sotme duke e çuar numrin e përgjithshëm të personave të rikuperuar pas infektimit me COVID-19 në 76. Lajmin e gëzuar e ka bërë me dije kryeministri Rama përmes një postimi në rrjetet sociale.
“LAJM I MIRË: 9 TË SHËRUAR SOT”, shkruan Rama.
Ndërkaq, Ministrja e Shëndetësisë, Ogerta Manastirliu duke konfirmuar faktin se edhe 9 persona të tjerë kanë rezultuar negativ pas infektimit me koronavirus, thekson se ka shkuar në 76 numri i përgjithshëm i të shëruarve.
“Lajm i mirë. Edhe 9 të shëruar sot. Shkon në 76 numri i të shëruarve nga COVID-19″, shkruan Manastirliu përmes një postimi në Twitter.
Kujtojmë se, 16 raste të reja janë konfirmuar me COVID-19 në Shqipëri gjatë 24 orëve të fundit, nga 152 teste të kryera, duke e çuar në total numrin e të infektuarve në 259. Nga 16 rastet e reja, 11 janë regjistruar në Tiranë, qyteti më i prekur nga koronavirusi, 3 në qytetin e Durrësit, 1 në qytetin e Korçës dhe 1 tjetër në Kavajë. Ndërkohë, lajmi i mirë është ditën e djeshme nuk ka patur viktima nga COVID-19 në vend.
Mosha mesatare e të prekurve në vendin tonë është 50-vjeç e ndërsa e viktimave 66-vjeç. Ministria e Shëndetësisë bën me dije se 79 pacientë janë të shtruar deri tani në spitalin e Infektivit në QSUT. Sipas Ministrisë së Shëndetësisë, 7 nga këta persona janë në terapi intensive, nga të cilët 4 janë të intubuar.