Meksika filloi vaksinimin e të moshuarve në më shumë se 300 komuna në të gjithë vendin, pasi mori afërsisht 870,000 doza të vaksinës AstraZeneca COVID-19. Përpjekja ishte përqendruar kryesisht në komunitetet e largëta rurale. Qindra njerëz mbi moshën 60 vjeç u rreshtuan para agimit në disa cepa të largëta të kryeqytetit Mexico City për për t’u vaksinuar.
Zyrtarët inkurajuan njerëzit që të mos vinin të gjithë menjëherë. Qeveria ka caktuar 1.000 vende vaksinimi, përfshirë shkollat dhe qendrat shëndetësore, kryesisht në komunitetet më të varfra të vendit.
Presidenti Andres Manuel Lopez Obrador tha të hënën se moti i keq dhe bora e bën të pamundur mbërritjen e vaksinës në disa zona të izoluara në veriperëndim të Meksikës. Ai tha se forcat e armatosura, të cilat janë përgjegjëse për fushatën e vaksinimit, po punonin për të hyrë në ato zona.
Meksika filloi vaksinimin e punëtorëve shëndetësorë në mes të dhjetorit me rreth 726,000 doza të vaksinës Pfizer-BioNTech. Një tjetër dërgesë e vaksinës së Pfizer pritet gjithashtu këtë javë. Vaksina Sputnik V e Rusisë dhe një tjetër nga Kina, të cilat kanë marrë miratim emergjent nga rregullatorët meksikanë, priten gjithashtu të vijnë këtë vit.
Lopez Obrador, i cili doli pozitiv për COVID-19 muajin e kaluar, inkurajoi të moshuarit që të vaksinohen. “Nuk ka rreziqe … Përkundrazi, është për t’i mbrojtur ata,” tha ai, duke shtuar se qeveria ka në plan të bëjë vaksinën të disponueshme për të gjithë.
Meksika ka raportuar më shumë se 1.9 milionë raste COVID-19 dhe më shumë se 174,000 vdekje të lidhura me koronavirusin, sipas të dhënave të Universitetit Johns Hopkins. Qeveria tha se dëshiron të vaksinohen të gjithë personat mbi moshën 60 vjeç nga mesi i prillit. Meksika krijoi një faqe në internet për të moshuarit për t’u regjistruar për vaksinën, por ajo kishte probleme teknike në ditët fillestare për shkak të kërkesës së lartë.
Ndërsa disa njerëz që u vaksinuan të hënën në Mexico City ishin regjistruar në këtë faqe dhe kishin marrë një mesazh me tekst që konfirmonte kohën e tyre. Zyrtarët thanë se të moshuarit që u paraqitën nuk do të tërhiqeshin. Mediat lokale raportuan se dhjetëra vende u ngritën në tre lagje të vendosura në periferi të qytetit, ku zyrtarët planifikojnë të administrojnë gati 80,000 doza deri të premten.
Të dielën, Lopez Obrador tha se atletët olimpikë meksikanë do të konsiderohen gjithashtu një grup përparësor për vaksinimin. “Ne duhet t’i vaksinojmë të gjithë”, tha ai gjatë një konference për shtyp në Oaxaca.
