Australia i ka kërkuar Komisionit Evropian të rishikojë vendimin për të bllokuar një dërgesë prej 250,000 dozave të vaksinës AstraZeneca . Ministri i Shëndetsisë Greg Hunt tha se qeveria e tij kërkoi menjëherë kërkoi një rishikim dhe se ata tanimë janë në pritje të një përgjigje.
“Padyshim që është mjedisi ndërkombëtar më konkurrues që nga Lufta e Dytë Botërore,” tha Hunt.
Kontrollet e eksportit – të cilat janë kritikuar gjerësisht si një shembull i rrezikshëm i “nacionalizmit të vaksinave” – u hartuan në janar pasi gjigantët e farmaceutikës paralajmëruan se furnizimi me vaksina në Evropë gjatë muajve të ardhshëm do të shkurtohej për shkak të vonesave të prodhimit.
Më shumë se 150 dërgesa ndërkombëtare të vaksinës AstraZeneca nga Evropa u autorizuan pa pengesa gjatë javëve të fundit, por Italia tani ka kundërshtuar dërgimin në Australi, bllokimi i cili ma pas u mbështet nga Komisioni Evropian.
Ministria e Punëve të Jashtme të Italisë e justifikoi ndalimin duke thënë se Australia konsiderohej “jo e prekshme” në këtë pikë nga pandemia e koronavirusit. Gjithashtu ata shprehën kundërshti për sasinë e madhe të dozave që po dërgohej në Australi krahasuar me sasinë e shpërndarë në Itali dhe vendet e tjera në kontinent.
Vendimi për të bllokuar dërgesën e vaksinave në Australi është hera e parë që Komisioni Evropian përdor kompetencat e tij për të ndaluar eksportimin e vaksinave të prodhuara në kontinent nga Pfizer dhe AstraZeneca nga territori i saj.
Australia nisi programin e imunizimit dy javë më parë, duke vaksinuar fillimisht stafin shëndetësor dhe qytetarët e moshuar me vaksinën Pfizer, edhe pse dozat e kësaj të fundit janë të kufizuara në të gjithë botën.
