Kur ka kaluar më tepër se një vit nga vrasja e një 39-vjeçari për shkak të prishjes së pazareve të drogës, Gjykata e Korçës ka vendosur për marrjen në pyetje të një dëshmitari kyç për ngjarjen ku mbeti i vdekur Zarif Aliu.
Për ngjarjen e ndodhur më 18 mars 2017, i akuzuari kryesor është David Myrten. Vetë 25-vjeçari pretendon pafajësinë, duke mohuar të gjitha akuzat. Ndërkohë, sipas Prokurorisë, Myrte në bashkëpunim edhe me persona të tjerë, pas një konflikti për motive të dobëta, dyshohet të kenë vrarë me paramendim Zarif Aliun, 39 vjeç, banues në fshatin Vërdovë, Pogradec, si edhe kanë plagosur Mendar Burnazin, 42 vjeç, banues në Nizhavec.
Ndërkohë, dje gjykata ka lëshuar një letërporosi për një dëshmitar kyç. Bëhet fjalë për shtetasin D.Papa, i cili ndodhet i burgosur në Larisa të Greqisë dhe dëshmia e tij do të merret nëpërmjet letërporosisë.
Mbrojtja e të akuzuarit për vrasje pretendon që D. Papa ka qenë personi që ka komunikuar me viktimën me telefon ditën e vrasjes dhe jo 25-vjeçari Myrte.
Seanca e radhës është shtyrë nga gjykata me dy muaj, në pritje të letërporosisë nga Greqia. /Panorama
