Irani ka kapacitetin teknik dhe industrial për të rifilluar me shpejtësi pasurimin e uraniumit dhe për të ndërtuar një armë bërthamore brenda pak muajsh, paralajmëroi këtë fundjavë kreu i Agjencisë Ndërkombëtare për Energjinë Atomike (IAEA), Rafael Grossi.
Duke folur për CBS News, Grossi tha se pavarësisht goditjeve ajrore nga SHBA dhe Izraeli mbi objektet bërthamore iraniane, Teherani ende ruan infrastrukturën thelbësore për të rinisur aktivitetet e ndjeshme bërthamore.
Ka ende kapacitete teknologjike dhe industriale. Nëse Irani vendos, do të mund të rifillojë prodhimin e uraniumit të pasuruar brenda pak muajsh,” deklaroi Grossi.
Komentet e tij vijnë pas një serie goditjesh ajrore më 13 qershor, ku Izraeli dhe më pas SHBA synuan tre nga objektet kryesore bërthamore të Iranit – Fordo, Natanz dhe Isfahan – duke pretenduar se Teherani ishte pranë ndërtimit të një arme bërthamore.
Tensionet mbi programin bërthamor iranian janë rritur ndjeshëm muajt e fundit, ndërsa vëzhguesit ndërkombëtarë po ndjekin me shqetësim çdo lëvizje të Teheranit drejt rikthimit të pasurimit në nivele të rrezikshme.
