Në përfundim të Konferëncës së Kryetarëve, aty ku PD ka kërkuar dorëheqjen e Gramoz Ruçit, në ambientet jashtë kryesisë së kuvendit Fatmir Mediu ka deklaruar se dy nga institucionet më të rëndësishme të reformës në drejtësi nuk mund të funksionojnë.
Fjala është për Këshillin e Lartë të Prokurorisë (organi që vendos ndër të tjera për zgjedhjen e kryeprokurorit) dhe Këshillin e Lartë Gjyqësor (kupolën institucionale që zëvendëson KLD-në e sotme).
Fatmir Mediu i është referuar vendimit të vjetshëm të Gjykatës Kushtetuese, e cila ka rrëzuar një sërë nenesh të ligjit që parashikon këto dy institucione, duke sqaruar se jemi në kushtet kur edhe sikur këto struktura të ngrihen, nuk do të mund të funksiononin normalisht. Sipas Mediut, maxhoranca bën të “paditurën” mbi këtë fakt dhe gjen |”sebepe” për të vonuar plotësimin e këtyre vakumeve ligjore, pasi qëllimi i qeverisë sipas deputetit të opozitës mbetet kapja e reformës.
“Indiferenca në këtë proces për të vazhduar dhe proceduar me struktura të përkohshme ka për qëllim që të kapë reformën në drejtësi. Ne e ngritëm edhe sot në mbledhje që është e detyrueshme, që parlamenti ka detyrim të plotësojë vakumet ligjore të KLP e KLGJ.
Kishte një justifikim që “sapo ka ardhur” vendimi i Gjykatës Kushtetuese, por duket që kjo është përdorur më shumë si një sebep për të kapur reformën.”-tha Mediu.
