Për incidentet që ndodhën në pallatin e sportit “Farie Hoti” të premten e kaluar, në derbin mes Tiranës dhe Partizanit në basketboll, Komisioni i Disiplinës në Federatën Shqiptare të Basketbollit ka vendosur sot masën ndëshkimore.
Ekipi i Tiranës, si organizator i ndeshjes, është dënuar me 2 ndeshje pa tifozë, 30 mijë lekë gjobë për hedhje të objekteve të rrezikshme në parket, plus edhe 50 mije lekë të tjera gjobë. Gjithashtu, pas konfrontimit të tifozëve me lojtarët e Partizanit, ndeshja u vendos në tavolinë, 20-0 për të kuqtë.
Ndërkohë, basketbollisti Pylla i Partizanit, për ofendim të tifozerisë kundërshtare është gjobitur me 10 mijë lekë gjobë, ndërsa bashkë me basketbollistin Daliu kanë marrë të dy paralajmërim për përjashtim nga aktiviteti, në rast përsëritje të këtyre rasteve.
