Paraditen e sotme në orën 10:00 do të mblidhet Komisioni i posaçëm për Reformën Zgjedhore për të diskutuar draftin e ekspertëve për depolitizimin. E thënë ndryshe, ekspertët propozojnë formulën e zgjedhjes së komisionerëve jo nga partitë politike por nga administrata publike ose persona të tjerë, por që më parë duhet të kalojnë nga Shkolla Shqiptare e Administratës Publike. Ndërkohë që mbledhja e sotme, ashtu si ajo e pak ditë më parë ku u diskutua drafti për financimet politike, do të zhvillohet me dyer të mbyllura.
Komisioni i Posaçëm Parlamentar i Reformës Zgjedhore është i ndarë në 4 grupe pune, teksa drafti që u publikua dje është i dyti, pasi pak ditë më parë doli në media drafti i parë që lidhej me financimet e fushatës elektorale. Ndërsa debati më i madh lidhet me sistemin zgjedhor, teksa pritet drafti nga grupi që po e harton. Në këtë komision nuk merr pjesë opozita jashtë parlamentit, PD-ja ka organizuar një tryezë paralele me aleatët.
Kryeministri Rama ka deklaruar se brenda dhjetorit do të miratohet faza e parë e reformës vetëm me rekomandimet e OSBE-së, ndërsa në të dytën mund të diskutohet ndryshimi i sistemit. Por opozita e re ka vendosur kusht që me ndryshimet që do të miratohen të kalojë edhe ndryshimi i sistemit zgjedhor. Damian Gjiknuri pak ditë më parë la një derë të hapur, por mbetet për t’u parë se cfarë do të ndodhë.
