Procedura e përzgjedhjes së komisionerëve të institucionit të Avokatit të Popullit, ka përplasur dje në Parlament opozitën dhe maxhorancën. Deputetët e PD janë larguar dje nga mbledhja e Komisionit të Ligjeve, duke refuzuar të marrin pjesë në procedurën e seancave dëgjimore me kandidatët e propozuar nga ish-Avokati i Popullit, Igli Totozani, për 5 poste vakante të komisioneve të këtij institucioni.
Procedura, ndjekur nga Igli Totozani, është hetuar administrativisht nga Avokatja e re e Popullit, Erinda Ballanca , e cila ka arritur në konkluzion se, lista e kandidatëve për komisionerë është hartuar në shkelje të ligjit.
Në shkresën e saj drejtuar Kuvendit, Avokatja e Popullit, Erinda Balanca, thekson se kandidaturat janë dërguar nga Totozani, ditën që ajo është zgjedhur në krye të këtij institucioni, duke i hequr të drejtën titullarit të sapozgjedhur për të propozuar kandidatura për komisionerë.
“Konstatojmë se procedura e ndjekur nga Avokati i më- parshëm i Popullit për verifikimin, shqyrtimin, vlerë- simin dhe deri te propozimi drejtuar Kuvendit të Shqipërisë, më datë 22.05.2017, të kandidaturave për komisionerë në institucionin e Avokatit të Popullit, ka shkelje të rënda duke na vënë përpara kushteve të pavlefshmërisë absolute, parashikuar nga germa “a/ii”, e nenit 108 dhe 109 të Kodit të Procedurës Administrative”, thekson në letrën e saj, Avokatja e Popullit.
QËNDRIMI
Në emër të opozitës, deputeti i PD-së, Eduard Halimi bëri të ditur se opozita nuk do merrte pjesë në seancat dëgjimore me kandidatët e propozuar nga ish-Avokati i Popullit, pasi ata ishin përzgjedhur jo sipas procedurave ligjore.
“Avokati i Popullit ka kërkuar që të anulohet e gjithë gara dhe të hapet nga e para, pasi rezulton se ligji është shkelur me të dyja këmbët. Ne mbështesim pa asnjë rezervë qëndrimin e Avokatit të Popullit lidhur me deklarimin e procesit të përzgjedhjes së kandidatëve, si në kundërshtim flagrant me ligjin, konkretisht me nenin 33/1, pika 5. Ne nuk do marrim pjesë në seancë dëgjimore me kandidatët, pasi çmojmë që procesi i përzgjedhjes duhet të kryhet vetëm në zbatim të ligjit dhe të nenit 33/1, vetëm në bashkëpunim me organizatat e shoqërisë civile”, ka thënë dje Halimi.
Ai ka shtuar më tej se opozita nuk mund të ishte pjesë e këtij procesi joligjor. “Ne nuk marrim pjesë te procesi i këtyre seancave dëgjimore, me këta kandidatë, pasi kjo listë është në kundërshtim flagrant me ligjin”, ka thënë deputeti i PD, Eduard Halimi. Pas këtij qëndrimi, demokratët u larguan nga salla e Komisionit të Ligjeve.
PËRGJIGJA
Por në kundërpërgjigje, kryetari i Komisionit të Ligjeve, Ulsi Manja, theksoi se pretendimet e Avokatit të Popullit nuk qëndrojnë. Sipas Manjës, kjo është çështje e brendshme e një institucioni. “Është e vërtetë që Avokati i ri Popullit është zgjedhur në Parlament, më datë 22.05.2017, por betimin e ka bërë më datë 17 qershor 2017 dhe ligji për Avokatin e Popullit garanton vazhdimësinë e institucionit. Pra, të avokatit në detyrë, deri në betimin e avokatit të ri.
Deri këtu jemi tërësisht konform ligjit për Avokatin e Popullit. Jemi në kushtet kur një organ kushtetues, siç është Avokati i Popullit, i ankohet një organi kushtetues, që është Kuvendi lidhur me procedurat e brendshme që duhet të ndjekë ky institucion”, ka thënë Ulsi Manja. Pas këtij qëndrimi, socialistët kanë vijuar seancat dëgjimore me kandidatët e propozuar nga Totozani.
