Për ish-kreun e Shërbimit Informativ Shtetëror Fatos Klosi dorëheqja e Visho Ajazi Likës nuk përbën ndonjë surprizë, pasi sipas tij kjo duhet të kishte ndodhur më parë. “Kjo lëvizje duhet të ishte bërë me kohë. Kreu i SHISH është vartës direkt i kryeministrit dhe në një lloj forme ky i fundit është punëdhënësi i tij”-shprehet Klosi.
Nuk ndalon për të diskutuar emrat konkret, por e lidh me mbarëvajtjen e institucioneve dhe sipas tij për një funksionim me të mirë mes dy institucioneve si qeveria dhe shërbimi inteligjent duhet bashkëpunim.
“Deri më tani kam parë marrëdhënie të mira mes kryeministrit dhe drejtuesit të SHISH, por lindin edhe shumë pyetje të tjera, pasi shumë gjëra nuk dihen. Përse nuk e dha më parë dorëheqjen kreu i SHISH, p.sh para nja muaji, por vensosi ta japë pikërisht tani?-ngre pikëpyetjen Klosi, ndërsa shton se: “për të kuptuar të vërtetën e dorëheqjes duhet të presim reagimet e kryeministrit dhe ish-drejtuesit të SHISH”.
Ndërsa për propozimin që në krye të SHISH të jetë Helidon Bendo nuk ka ndonjë qëndrim por shprehet se ka ardhur koha që nën drejtimin e shërbimit inteligjent të jenë persona të rinj.
“Nuk e njoh, nuk e kam arritur në kohën kur drejtoja SHISH pasi janë të rinj dhe për mua kështu duhet të jetë, drejtimin e SHISH ta marrin të rinjtë”-tha Klosi.
