Neymar nuk do ta harrojë lehtësisht klasiken e tij të parë në Francë. Në sfidën e duelit historik me rivalin e përjetshëm të PSG-së, Olimpique de Marseille, braziliani ishte një nga personazhet kryesorë të mbrëmjes.
Duhet të ishte një festë sfida e së dielës në mbrëmje edhe për shkak të lamtumirës së futbollit nga ana e Lorik Canës dhe Gibril Cise, por tifozët në “Velodrom” nuk u përmbajtën dhe hodhën objekte të ndryshme në fushën e lojës në drejtim të lojtarëve të PSG-së.
Objektivi kryesor ishte Neymar, i cili u detyrua të braktiste fushën e lojës në minutat e fundit, pasi u ndëshkua me karton të kuq pas zënkës që pati me njërin prej lojtarëve kundërshtarë.
Sulmuesi brazilian nuk i mbajti dot nervat në fundin e ndeshjes dhe u shpreh i rebeluar për sjelljen e pahijshme të tifozëve kundërshtarë.
“Ishte e ekzagjeruar. Më kanë goditur me gjithçka. Hodhën në fushë lëng portokalli, shkopinj, Coca-Cola. Gjithçka. Ky nuk është futboll”, tha fillimisht Neymar, i cili u mor në mbrojtje nga forcat e sigurisë së stadiumit që të godiste i qetë kornet.
Gjatë fjalës së tij, sulmuesi brazilian pranoi edhe gabimet që bëri në fushën e lojës. “Unë nuk jam i ftohtë. Kam gjak dhe bëj gabime në fushë dhe nuk më pëlqeu ndërhyrja që bënë ndaj meje. Rivalët bënë gjithçka kundër nesh dhe ia dolën të na merrnin një barazim”, përfundoi Neymar.