Infektimet në vend gjatë Shkurtit kanë pësuar rënie të konsiderueshme sipas specialistëve. Nëse në fund të Janarit 1 në 5 persona të testuar rezultonte pozitiv me Covid-19, ditët e fundit raporti është 1 në 10 del pozitiv.
“Numri mesatar i personave të infektuar është shumë i vogël. Më i lartë ka qenë në Janar ku në çdo 5-6 testime, kishim një rast pozitiv. Pozitiviteti ka rënë, 1 në 12 ose 15 persona rezultojnë të tillë”.
Disa nga vatrat më kryesore të koronavirusit në kryeqytet, sipas epidemiologut Rexhep Muja mbeten Kinostudio, Astiri apo Kombinati.
“Vazhdon Kinostudio ku edhe sot po i ndjek disa raste sepse këtu ka popullatë më të madhe, si dhe Astiri e Kombinati që janë të përditshme”.
Kryesisht rastet pozitive evidentohen nga specialistët me test të shpejtë, por kur kanë dyshime kryejnë edhe testin PCR.
“Kur ka dyshime përdorim PCR, por ecim me testin molekular. Me testet e shpejta orientohemi, por kur nuk ka përcaktueshmëri ose rezultat të saktë, vazhdojmë me testin molekular”.
Epidemiologët theksojnë se personat e infektuar me Covid-19 janë grupmosha të ndryshme dhe mbi të gjitha të pavaksinuar.
