Presidenti kinez, Xi Jinping i kërkoi krerëve të kompanive të teknologjisë të mbledhur sot në një konferencë të internetit që të respektojnë sovranitetin e hapësirës kibernetike, një frazë që qeveria Kineze përdor për të legjitimuar censurimin e rrjetit.
“Dera e Kinës për botën nuk do të mbyllet kurrë, por vetëm do të hapet më shumë”, tha ai.
Krerët ekzekutivë të gjigantëve amerikanë të teknologjisë, përfshirë kryetarët e “Google”, Sundar Pichai dhe të “Apple”, Tim Cook janë të pranishëm në këtë Konferencë Botërore të Internetit që zgjat tre ditë, në krahë të sipërmarrësve kinezë të internetit si Jack Ma (Alibaba), Pony Ma (Tencent) dhe Robin Li (Baidu).
Kjo kënferencë vjetore organizohet nga qeveria kineze, që aplikon një prej kontrolleve më të lartë mbi internetin dhe median shkruan ‘ata’.
Kina ka më shumë se 731 milionë përdorues të internetit, sipas të dhënave zyrtare.
Megjithatë aksesi në faqet e huaja është rreptësisht i kontrolluar.
“Facebook”, “Google”, “Twitter”, “YouTube” si dhe faqet e lajmeve përfshirë “The New York Times” dhe “The Wall Street Journal” janë të bllokuara dhe mund të aksesohen vetëm nëpërmjet rrjeteve virtuale private ose siç njihen ndryshe VPN.
