Ahmet Ajeti, 35-vjeç nga Torina e Lipjanit është arrestuar shumë kohë më parë nga Policia e Kosovës, pasi ishte i shpallur në kërkim nga autoritetet në Shqipëri me dyshimin për vrasje me pagesë të kryer në vitin 2016.
Por, pavarësisht arrestimit, ai ende nuk është ekstraduar në Republikën e Shqipërisë për tu përballur me Gjykatën, raporton Indeksonline.
Krejt kjo vonesë, sipas Gjykatës Themelore në Prishtinë është bërë pasi i akuzuari Ajeti ka ushtruar padi ndaj vendimit të Ministrisë së Drejtësisë për ekstradim.
Indeksonline ka kontaktuar zyrtarë të Ministrisë së Drejtësisë për të marrë informacione në lidhje me këtë rast, mirëpo të njëjtit kanë sugjeruar që pyetjet t’i adresohen Gjykatës Themelore në Prishtinë, pasi që sipas informatave të fundit që ata kanë marrë, procedura në lidhje me këtë çështje është ende në zhvillim.
E në Gjykatën Themelore të Prishtinës kanë konfirmuar se autoritetet në Shqipëri kanë kërkuar ekstradimin e Ajetit me 16 maj 2017 dhe ishte lejuar ekstradimi i tij, por për shkak të një padie që i akuzuari ka parashtruar kundër MD-së, rasti ende mbetet i hapur.
“Gjykata Themelore në Prishtinë me Aktvendimin, NjN.nr.1/16, ka lejuar ekstradimin e të njëjtit për në Republikën e Shqipërisë, por i njëjti pastaj ka bërë padi në Gjykatën Themelore në Prishtinë – Departamenti për Çështje Administrative kundër vendimit të Ministrisë së Drejtësisë për ekstradim”, ka deklaruar për Indeksonline, Mirlinda Gashi, Zyrtare për Informim në GjThP.
Ajo ndër të tjera thotë se aktualisht në Gjykatën Themelore në Prishtinë – në Departamentin për Çështje Administrative ka përfunduar procedura lidhur me këtë çështje dhe tani është duke u bërë përpilimi i aktgjykimit./Indeksonline/
