Një ngjarje tragjik është shënuar mëngjesin e sotëm në Kavajë, me pasojë vdekjen e dy personave. Aksidenti i rëndë ka ndodhur te ‘Mali i Robit’, ku kanë mbetur edhe dy persona të tjerë të plagosur, mes tyre një fëmijë, i cili është dërguar me urgjencë në spital dhe ndodhet në gjendje të rëndë.
Nga informacionet e para, Report Tv mësoi se dyshohet që një makinë ka dalë nga rruga dhe ka marrë përpara njerëzit. Ende nuk dihen detaje të tjera për ngjarjen e rëndë.
Informacion paraprak i policisë:
Me datë 24.02.2018 rreth orës 07:40, tek Mali i Robit në afërsi të Kavajës, ka ndodhur një aksident me pasojë vdekjen.
Mjeti tip “Toyota” me drejtuese I. P., 30 vjeçe, ka aksidentuar me pasojë vdekjen 2 shtetas (vjehrri dhe nusja) shtetasit Xh. F., 69 vjeç dhe E. F., 34 vjeçe. Gjithashtu është lënduar edhe fëmija i mitur XH. F, 8 vjeç, i cili u transportua në spitalin e Durrësit, dhe ndodhet nën kujdesin e mjekëve.
Paraprakisht dyshohet se shkak i aksidentit ka qenë humbja e kontrollit gjatë drejtimit të mjetit. Grupi hetimor po kryen veprimet për zbardhjen e plotë të aksidentit, ndërsa drejtuesja e mjetit është shoqëruar në Komisariat për veprime të mëtejshme.
