Dekanët e katër fakulteteve në Universitetin e Tiranës, i kanë dërguar ditën e sotme një letër zyrtare ministres së Arsimit, Lindita Nikolla, përmes së cilës kërkojnë fillimin e procedurës disiplinore për shkarkimin e Rektorit Mynyr Koni.
Letra mban firmën e dekanit të Fakultetit të Drejtësisë, Artan Hoxha, të Fakultetit të Ekonomisë, Dhori Kule, Fakultetit të Shkencave Sociale, Edmond Rapti, dhe dekanit të Fakultetit të Gjuhëve të Huaja, Artur Sula.
“Mbas përpjekjesh të shumta, diskutimesh të gjata dhe një morie të pafund shkëmbimi shkresor me Rektorin e Universitetit të Tiranës (UT), zotin Mynyr Koni, kemi arritur në përfundimin se vazhdimësia e mëtejshme e tij në detyrë është në dëm të interesave ët zhvillimit të Universitetit të Tiranës.
Në këto 17 muaj të administrimit të Universitetit, kemi konstatuar shkelje të rënda dhe të vazhdueshme ligjore në veprimtarinë e Rektorit të Universitetit, të cilët kanë krijuar një situatë të rëndë paligjshmërie me efekte të drejtpërdrejta në mosfunksionimin normal të të gjitha strukturave të UT, të cilat janë të lidhura drejtpërdrejt apo indirekt me autoritetin e Rektorit të Universitetit”, thuhet në letrën drejtuar ministres Nikolla.
