Dan Hutra ekzekutoi me armë zjarri më 1 mars edhe Etleva Kurtin, 31-vjeçaren e cila është motra Vladimir Kurtit, që aktualisht ndodhet pas hekurave për një vrasje të kryer.
Ajo u ekzekutua teksa ndodhej në oborrin e banesës së saj duke nderë rrobat, ndërsa e ëma ishte në kopshtin e banesës.
Të dyja, nënë e bijë mësohet se jetonin të vetme pasi vëllezërit ishin larguar jashtë vendit për shkak të frikës nga gjakmarrja, nga vrasja që ka kryer Vladimir Kurti.
Një nga fqinjët e familjes Kurti, ka deklaruar për gazetarët këtë të enjte se krimi i ka tronditur, pasi nënë e bijë nuk kishin asnjë faj dhe madje as nuk ruheshin nga gjakësi, sipas asaj që përcakton Kanuni.
Deklarata e fqinjit: Të vrasësh një njeri të pafajshëm duke nderë rrobat, kjo është katastrofë. Ajo familje e mirë, pati bërë djali një sherr ai po e vuan këtio të tjerët ca halli kanë?
Ça i ka gjet? Po ne nuk kemi shtet se të bësh një vrasje, dy tre e katër, atje në Greqi dha ministri i rrugës dorëheqjen kurse këtu cfarë bëhet këtu? Ministri duhet të kishte dhënë dorëheqjen, ministri i drejtësisë, drejtori i policisë automatikisht duhet të kishte dhënë dorëheqjen.
Ka shëtit burri i huaj në gjithë Tiranën, çfarë bëhet me këtë shtet? Me ngjarjen jemi tepër të tronditur, se të vrasësh një vajzë 31 vjecare pa faj, krejt e pafajshme.
Kjo gruaja dhe vajza nuk janë ruajtur se sipas Kanunit të lekë Dukagjinit nuk vritet femra, nuk merr gjak te femra, gjakësi është nga Dibra e njeh Kanunin. Ka një vëlla të sëmurë e të tjerët janë larguar ngaqë janë në gjak, kaq dimë ne. Por shtet këtu nuk ka.
Vetëm me nënën e saj jetonte në banesë. Sot e kanë nisur për ta përcjellë për në banesën e fundit në Burrel, kishin 30 vite këtu.
