Ndërsa situata në të gjitha komunat është raportuar të jetë e qetë në ditën e votimit, e njëjtë nuk ka qenë në Mitrovicën e Veriut. Policia e Kosovës, së bashku me njësitet speciale të EULEX-it dhe KFOR-it ka zhvilluar një aksion të madh me ç’rast kanë arrestuar tre serb.
E gjitha ka ndodhur pasi një autobus i mbushur me 57 serbë në statusin e refugjatit që vinte nga Kraleva drejt Veriut për të votuar, është ndalur nga policia me ç’rast i kanë gjetur dy granata dore dhe dy detonatorë elektrikë.
Baki Kelani, zëdhënës i policisë ka konfirmuar se mjetet në fjalë janë larguar në mënyrë të kontrolluar nën masa sigurie nga njësitet relevante të policisë që merren me trajtimin e materieve shpërthyese.
“Autobusi është ndaluar në pikën kufitare në Jarinje. Pasi ka kanë hasur në disa mjete të dyshimta, që dyshohet të jetë eksploziv plastik. Si rezultat i veprimit të policisë janë shoqëruar në stacion policor tre persona të nacionalitetit serb për intervistim, dhe gjitha veprimet tjera do të ndermirën në konsultim të ngushtë me prokurorët kompetentë”, ka njoftuar Kelani për mediat kosovare.
Pas kapjes së tre personave trafiku, policia ka çaktivizuar granatat dhe më pas është liruar trafiku në Jarinje dhe qytetarët serbë janë lejuar të shkojnë për të votuar.
Nuk dihet nëse me këto mjete shpërthyese serbët kishin për qëllim të prishin procesin zgjedhor apo jo.
Megjithatë mbetet ditësh policia të japë informata pasi të merren në pyetje tre të dyshuarit, ku njëri prej tyre është shoferi i autobusit.
Probleme edhe te Dheu i Bardhë
Probleme me ardhjen e serbëve në Kosovë ka pasur dhe në pikëkalimin e Dheut të Bardhë. Policia nuk ka lejuar të hyjnë autobusët, për shkak të mungesës së lejeve për operime, ndërkohë që kjo ka bërë që serbët ta kalojnë këmbë kufirin.
Partia Lista Srpska e Goran Rakiqit ka reaguar për rastet në fjalë duke thënë se “veprimet e Prishtinës në pikëkalimet administrative janë një përpjekje që të ndalohen personat e shpërngulur në Serbinë qendrore që të mos votojnë dhe që të mos deklarohen për lidhje më të forta të serbëve në krahinë me shtetin e Serbisë”.
Kjo parti ka theksuar se nuk do t’i pranojë rezultatet nëse serbëve që kanë të drejtë të votës nuk u mundësohet një gjë e tillë.
