Ilir Meta ka sulmuar Qeverinë me një shkrim të Artan Hoxhës (presidentin në tentativë, jo gazetarin nga Skrapari), për situatën që u krijua në pikën doganore të Kakavijës.
Meta ka publikuar në Facebook, një shkrim të Hoxhës, ku theksohet se kriza në Kakavijë mund të parandalohej.
Meta mbështet mendimin se shteti ynë u kap tërësisht i papërgatitur për t’i shërbyer popullit të tij.
Postimi i plotë:
KAKAVIJA, KRIZA QË MUND TË PARANDALOHEJ! Nga Artan Hoxha: Dihet që edhe në kohë normale kthimi në Greqi në këto ditë të gushtit krijon radhë. Aq më shumë në këto kohë pandemie ishte i parashikueshëm krijimi i superradhës. Lidhur me rregullat e lëvizjes në kushtet e COVID-19, institucionet janë më të mirëinformuarat e më të parainformuarat. Ndaj prej tyre kërkohet fillimisht parashikim dhe parandalim, më pasnderhyrje lehtësuese e zgjidhëse.
Shteti ynë u kap edhe këtë herë tërësisht i papërgatitur, a thua se ishte i tëri me leje të zakonshme. Mezi i shkund. Mezi u ngrit. U desh alarm medietik, transmetim me zë e figurë i hallit të madh dhe revoltës vluese të njerëzve që shteti të lëvizte më në fund për ca asistencë humanitare. Për parashikim e parandalim as që bëhet fjalë.
