Presidenti i Ukrainës, Volodymyr Zelensky, deklaroi se frika më e madhe e Rusisë është që vendet aleate të qëndrojnë të bashkuara. Këtë mesazh ai ia përcolli kryeministrit polak Donald Tusk gjatë takimit të tyre që po zhvillohet në Poloni.
Sipas Zelenskyt, uniteti politik dhe strategjik i partnerëve të Ukrainës përbën faktorin kyç për përballimin e agresionit rus dhe për ruajtjen e stabilitetit në rajon.
Duke mirëpritur mysafirin e tij, kryeministri polak Donald Tusk përsëriti deklaratën e mëparshme se, ndonëse është i kënaqur me marrëveshjen e arritur mbrëmjen e kaluar, ajo «mund të ishte edhe më e mirë». Megjithatë, ai shtoi se gjithmonë ka hapësirë për përmirësim.
«Gjithmonë ka vend për përmirësime, gjithmonë mund të bëhet diçka më efektive, por jam vërtet i kënaqur që të paktën realizuam atë që kishim premtuar», u shpreh Tusk.
Nga ana e tij, presidenti ukrainas Volodymyr Zelensky tha se Rusia kishte shpresuar që financimi i Bashkimit Evropian për Ukrainën të “anulohej”, si dhe që takimi për këtë çështje të “shtyhej ose edhe të anulohej”. Sipas tij, Europa tregoi rol udhëheqës, duke përshëndetur marrëveshjen për kredinë prej 90 miliardë eurosh të arritur mbrëmjen e kaluar.
Tusk i bëri gjithashtu një homazh personal Zelenskyt, duke i thënë se «lufta juaj është lufta jonë e përbashkët», dhe shtoi: «Ju nuk jeni hero vetëm në Ukrainë, por edhe këtu, në Poloni, ne ju konsiderojmë hero». Kur Zelensky u përpoq ta minimizonte këtë vlerësim, Tusk theksoi: «E di shumë mirë çfarë po them».
Kryeministri polak përsëriti se lufta e Ukrainës kundër Rusisë garanton edhe pavarësinë e Polonisë, e cila do të vihej në rrezik nëse Rusisë do t’i lejohej të fitonte luftën. Duke iu përgjigjur, Zelensky deklaroi: «Frika më e madhe e Rusisë është që ne të jemi të bashkuar, sepse ata nuk mund të na mposhtin të dyve».
Zelensky: Kredia e BE-së i dërgon mesazh Rusisë se lufta nuk ka kuptim
Presidenti ukrainas theksoi gjithashtu se vendimi i Bashkimit Evropian për t’i dhënë Ukrainës një kredi prej 90 miliardë eurosh është një mesazh i qartë për Rusinë se vazhdimi i luftës nuk ka kuptim, pasi Kievi mbështetet financiarisht.
Zelensky e cilësoi vendimin, të marrë mbrëmjen e kaluar në Bruksel, si një fitore për Ukrainën. Ai kujtoi se vendi përballet me një deficit buxhetor prej 45 miliardë dollarësh për vitin e ardhshëm dhe se fondet e BE-së do të përdoren për shpenzime sociale dhe për mbështetjen e përpjekjeve mbrojtëse.
Gjatë vizitës së tij në Varshavë të premten, Zelensky deklaroi gjithashtu se Ukraina mund t’i ofrojë Polonisë këshilla për mbrojtjen nga dronët dhe për rritjen e sigurisë në rajonin e Detit Baltik.
Në një konferencë të përbashkët për shtyp me presidentin polak Karol Nawrocki, Zelensky ftoi bizneset polake të marrin pjesë në rindërtimin e Ukrainës. Ai gjithashtu e ftoi Nawrockin të vizitojë Kievin, duke theksuar se marrëdhëniet mes Ukrainës dhe Polonisë duhet të mbeten të forta në kushtet e pushtimit rus të Ukrainës.
