Një studim i ri i publikuar në revistën “PLOS Genetics” ka zbuluar se gjenet e nënës mund të kenë një ndikim të madh në formësimin e indeksit të masës trupore (BMI) tek fëmijët, edhe në rastet kur këto gjene nuk trashëgohen drejtpërdrejt.
Sipas studiuesve nga “University College London”, të udhëhequr nga Liam Wright, ndikimi i nënës shpesh shfaqet përmes faktorëve të tërthortë – si zakonet e ushqyerjes gjatë shtatzënisë dhe sjelljet pas lindjes, të cilat fëmijët i marrin si model në përditshmëri.
Studimi, i cili analizoi të dhënat gjenetike dhe mjekësore të mbi 2,600 familjeve britanike me fëmijë të lindur në vitet 2001–2002 dhe të ndjekur deri në moshën 17-vjeçare, tregoi se roli i gjeneve të nënës është unik.
Ndryshe nga baballarët, tek të cilët ndikimi pasqyrohej kryesisht përmes trashëgimisë direkte gjenetike, tek nënat efekti ishte më kompleks dhe lidhej me faktorë të jetesës dhe kujdesin gjatë shtatzënisë.
Gjenetika e nënave është thelbësore në krijimin e mjedisit ku rritet fëmija, duke ndikuar kështu edhe në BMI-në e tij – shpjegoi Liam Wright, duke theksuar se qëllimi i studimit nuk është të fajësojë nënat, por të ndihmojë familjet që të ndërmarrin hapa më të shëndetshëm për gjeneratat e ardhshme.
Ky zbulim tregon rëndësinë e ndërhyrjeve në stilin e jetesës, sidomos tek gratë gjatë shtatzënisë, pasi ndryshime të vogla në shëndetin e tyre mund të kenë ndikim afatgjatë tek fëmijët.
