Vladimir Putin i ka dërguar një mesazh përshëndetje kryeministrit serb duke e uruar për fitoren e zgjedhjeve presidenciale. Në një postim në Telegram, Putini shprehu shpresën se Vuçiç do të vazhdojë të forcojë “partneritetin strategjik” midis Serbisë dhe Rusisë. Lajmin e bënë të ditur agjencitë ruse të lajmeve.
“Fitorja juaj bindëse e zgjedhjeve tregon për një mbështetje të gjerë popullore për përpjekjet tuaja që synojnë zgjidhjen e detyrave urgjente ekonomike dhe sociale me të cilat përballet Serbia, si dhe në ndjekjen e një politike të jashtme kuptimplote dhe të ekuilibruar,” thuhet në mesazh.
Pas fitores së Vuçiç u ngritën pretendime se qëndron Kremlini, por zëdhënësi i Putin, Dmitri Peskov i hodhi poshtë duke thënë se kryeministri në Serbi u zgjodh nga serbët, duke e konsideruar si gjë të papërshtatshme.
“Kremlini është i impresionuar nga fitorja e kryeministrit Aleksandar Vuçiç në zgjedhjet presidenciale të Serbisë, pasi ai është i përkushtuar për zhvillimin e marrëdhënieve me Moskën”, u tha gazetarëve të hënën Dmitry Peskov.
“Sigurisht, Moska mirëpret të gjitha forcat politike në Serbi që bëjnë thirrje për zhvillimin e mëtejshëm të marrëdhënieve tona dypalëshe. Z. Vuçiç e mbështet këtë dhe për këtë arsye, natyrisht, ne jemi të impresionuar që ai ka arritur të sigurojë fitoren në zgjedhjet. Unë besoj se nuk ishte Putini ai që zgjodhi presidentin serb, por populli serb që mori pjesë në votim. Për sa i përket asaj që mund të ketë ndikuar tek ata, do të ishte e papërshtatshme të bëhej ndonjë pretendim”, shtoi zëdhënësi presidencial rus.
