Takahiro Shiraishi, i njohur si “Vrasësi i Twitterit”, është ekzekutuar në Japoni pasi u shpall fajtor për vrasjen makabre të nëntë personave në vitin 2017, shumica gra të reja që kishin shfaqur mendime vetëvrasëse në rrjetet sociale.
Ekzekutimi u krye përmes varjes dhe përfaqëson rastin e parë të zbatimit të dënimit me vdekje në Japoni pas gati tre vitesh. Ngjarja ka ringjallur debatet në vend rreth dënimit kapital dhe respektimit të të drejtave të njeriut.
Shiraishi u arrestua në fund të vitit 2017, pasi autoritetet zbuluan mbetjet trupore të viktimave në apartamentin e tij në qytetin Zama, pranë Tokios. Hetimet zbuluan se ai i kishte joshur viktimat përmes Twitter-it, duke pretenduar se do t’i ndihmonte të vdisnin ose do të vdiste bashkë me to. Në vend të kësaj, ai i sulmoi seksualisht, i vrau dhe më pas i copëtoi trupat.
Tetë nga viktimat ishin gra, përfshirë adoleshente, ndërsa viktima e nëntë ishte i dashuri i njërës prej tyre, të cilin Shiraishi e vrau për të mbuluar gjurmët.
