Johannes Volkmann, deputet në Bundestagun gjerman dhe nip i ish-kancelarit Helmut Kohl, ka bërë thirrje që të gjitha shtetet e Bashkimit Evropian ta njohin Kosovën si shtet të pavarur dhe që ajo të pranohet si anëtare me të drejta të plota në Këshillin e Evropës.
Në fjalimin e tij të parë në Bundestag, gjatë një debati për vazhdimin e pjesëmarrjes së trupave gjermane në misionin paqeruajtës të KFOR-it, Volkmann shprehu mbështetje të qartë për shtetin e Kosovës, duke u bazuar edhe në vendimin e Gjykatës Ndërkombëtare të Drejtësisë që legjitimon pavarësinë e saj.
Ambasadori i Kosovës në Gjermani, Faruk Ajeti, e ndau videon e fjalimit të tij në rrjetet sociale, duke e falënderuar për mbështetjen. “Faleminderit Johannes! Ndërsa fjalimi i fundit i Helmut Kohl në Bundestag ishte më 1 korrik 1999, nipi i tij debutoi me një përkushtim të fuqishëm për Kosovën,” shkroi Ajeti në Facebook.
Volkmann theksoi se njohja e Kosovës nga të gjitha shtetet anëtare të BE-së është thelbësore për sigurinë dhe stabilitetin në Ballkanin Perëndimor, si dhe për avancimin e Kosovës drejt integrimit në strukturat ndërkombëtare.
