Deputeti demokrat, Myslim Murrizi, ka folur mbrëmjen e sotme publikisht për vendimin e tij për të mos djegur mandatin e deputetit.
Në emisionin “Arena”, në Ora News”, deputeti Murrizi ka deklaruar se në Kuvend ka skifterë, që sipas tij, vjedhin me firmë.
“Desha të sqaron shqiptarët për skifterat.
Ishin 19 skiftera në Kuvend që ligji i dekriminalizimit i nxorri jashtë Parlamentit.
Janë edhe disa skiftera të tjerë në Parlament që nuk vjedhin batanije por vjedhin me firmë.
Janë skiftera me kollare. Myslim Murrizi nuk bën pjesë tek asnjë lloj skifterash, por nuk jam dele”, ka deklaruar deputeti i PD.
Më tej, deputeti ka deklaruar se nuk është zgjedhur në krye të PD së Lushnjes as nga Sali Berisha dhe as nga Lulzim Basha, por nga votat e demokratëve të kësaj dege.
“Unë jam bërë kryetar i PD në 2014, as nga Berisha dhe as nga Basha, por nga votat e demokratëve të Lushnjes. Partia nuk merret me urdhër, por me votim.
Kush mendon se merr partinë me forcë, e ka gabim. Kryetar i PD, kur jam zgjedhur unë në Lushnje, ka qenë Lulzim Basha”, ka thënë Murrizi.
