Ish-ministri i Brendshëm Saimir Tahiri i shoqëruar nga avokati i tij Maks Haxhia në orën 09:00 ka mbërritur në gjykatën e Krimeve të Rënda për seancën paraprake.
Seanca paraprake duhej të zhvillohej që në 19 qershor, por ajo u shty për shkak të mungesës së tre ish-oficerëve të policisë që po gjykohen bashkë me Tahirin dhe janë në arrati, Sokol Bode, Jaeld Cela, Gjergji Kohila.
Herën e fundit, Saimir Tahiri kërkoi para mediave, që të mos shtyhet më gjyqi ndaj tij pasi sipas tij kishte persona të interesuar që dosja në ngarkim të tij të zvarritet.
“Dua të bëhet gjyqi im. Ka dy vite që zvarritet gjyqi im. Nuk dua të shtyhet seanca çdo 15 ditë. Dua të bëhet gjyqi im. Të gjykohem çdo ditë. Të shkoj përpara, të mos humb kohë. Boll kohë është humbur. Ju e dini shumë mirë që gjykimi i shkurtuar s’është pranim i fajësisë. Më vjen keq që jeni në kufijtë e abuzimit me pyetje.”-tha Tahiri.
Ardit Mustafaj, Flora Hajredinaj dhe Irena Gjoka janë 3 gjyqtarët që kanë në dorë gjykimin e çështjes Tahiri. Ish-ministri i Brendshëm, Saimir Tahiri akuzohet për trafik droge në kuadër të grupit të strukturuar kriminal. Në seancën e fundit ku u vendos se Tahiri do merrej si i pandehur, ish-ministri kërkoi që çështja e tij të kalojë me gjykim i shkurtuar.
