Gjykata e Tiranës ka dënuar 5 persona si të përfshirë në një rast mashtrimi për t’i zhvatur paratë një biznesmeni ndërtues.
Bëhet fjalë për Xhensil Hidën, i cili pretendonte se ishte kryebashkiaku i Tiranës, Erion Veliaj, dhe i dërgoi SMS në aplikacionin “Telegram” një ndërtuesi në Tiranë duke i kërkuar një shumë parash 70 mijë euro, me pretendimin se i nevojiteshin një miku të tij.
Në dosjen hetimore që Report Tv disponon, ndërtuesi ka treguar vendin që ishte caktuar si pikëtakimi për dorëzimin e parave.
“Më pasi ai i ka thënë se do t’ja dërgonte lekët te ai (duke nën kuptuar zyrën e Kryetarit të Bashkisë) dhe ai i ka thënë se nuk i donte lekët tek zyra, por do shkonte t’i merrte një person. Ditën e ngjarjes, ai i ka kërkuar t’i dërgonte një numër kontakti që t’i jepte lekët, dhe i ka thënë se do t’i dërgonte një numër dhe se i ka kërkuar të mos vonohej por të nisej për Vlorë. Më pas e ka marrë një numër telefoni duke i thënë se ishte tek lokal “****” në Lushnje duke i thënë se do të merrte porosinë, por kallëzuesi i ka kërkuar të vinte te biznesi i tij pranë “****”, Tiranë. Rreth orës 13:05 e ka telefonuar përsëri duke i thënë të dilte se ishte te parkimi i “****””,thuhet në vendim.
Hida është gjykuar në mungesë dhe u dënua me 3 vite burgim, që për shkak të gjykimit të shkurtuar, përfundimisht me 2 vite. Xhensil Hidaka qenë i arratisur në Gjermani ku dhe u arrestua për llogari të autoriteteve shqiptare pasi ndaj tij kishte masë sigurie “arrest në burg”. Ai u deportua nga Gjermania në vendin tonë dy ditë më parë, më 27 gusht, ndërsa sot në orën 14:00 u bë verifikimi i masës së sigurisë. Xhensil Hida nuk bëri asnjë koment në seancën e sotme, por pranoi se në vendimin e dhënë nga gjykata bëhet fjalë pikërisht për të.
Dënimi ndaj tij nuk ka marrë formë të prerë dhe do të vijojë të qëndrojë në masën “arrest në burg”.
Ndërsa i pandehuri tjetër, Leonard Xhika, u dënua gjithashtu me 2 vite burgim pas aplikimit të gjykimit të shkurtuar, por dënimi u pezullua në 4 vite shërbim prove.
Xhika ishte personi që kishte shkuar të merrte paratë nga ndërtuesi, sipas udhëzimit që i kishte dhënë Xhensil Hida.
Kurse 3 personat e tjerë, Mikel Panxhi, Xhonatan Xhaferri dhe Petro Ferzaj, u dënuan me nga 8 muaj burg për veprën penale të moskallëzimit të krimit. Këta ishin personat, të cilët u kontaktuan nga Xhensil Hida që të merrnin shumat e pretenduara të parave nga Leonard Xhika.
Sipas hetimeve të kryera nga prokurori i Tiranës, Arben Agovi, në fakt dorëzimi i vërtetë i parave nuk ndodhi asnjëherë, pasi ndërtuesi kishte njoftuar autoritetet dhe takimi që u realizua ishte i simuluar. Brenda çantës së pretenduar të parave, në fakt nuk kishte shuma monetare, por ishte e mbushur me letra. Pas dorëzimit të çantës nga biznesmeni, ndërhyri policia duke bërë arrestimet.
Biznesmeni ndërtues, i cili denoncoi ngjarjen, ka sqaruar se me personat në fjalë nuk ka njohje të mëparshme. Kjo ishte hera e dytë që persona të caktuar tentonin ta mashtronin për t’i marrë para. Rasti i parë kishte ndodhur 2 vite më parë, nga persona të tjerë.
