Izraeli ka njoftuar se Abu Obeida, zëdhënësi i krahut të armatosur të Hamasit, është vrarë në një sulm ajror në Gaza.
Ministri izraelit i Mbrojtjes, Israel Katz, përgëzoi Forcat e Mbrojtjes të Izraelit dhe agjencinë e sigurisë së Izraelit, Shin Bet, për “ekzekutimin e përsosur”.
Ai nuk dha detaje mbi kohën ose vendndodhjen e operacionit, por IDF më parë njoftoi se avionët e saj sulmuan “një terrorist kyç” në lagjen al-Rimal të shtunën, duke nxitur raportime në mediat izraelite se Obeida kishte qenë shënjestra.
Nga ana tjetër, Hamasi nuk e ka konfirmuar vdekjen e tij. Grupi i armatosur palestinez tha më parë se dhjetëra civilë u vranë dhe u plagosën në sulmet izraelite në një ndërtesë banimi në lagje.
Pesë raketa goditën katin e dytë dhe të tretë të ndërtesës gjashtëkatëshe njëkohësisht nga dy drejtime të ndryshme. Apartamenti i synuar ishte përdorur si klinikë dentare. Dëshmitarët raportuan për qindra mijëra dollarë që fluturuan në ajër për shkak të sulmit, para që dyshohet se ishin vjedhur nga anëtarët e Hamasit.
Obeida ishte ndër të paktët anëtarë të lartë të mbetur të krahut ushtarak të Hamasit që nga sulmi i tij vdekjeprurës më 7 tetor 2023 në Izraelin jugor. Në deklaratën e përbashkët të IDF dhe Shin Bet thuhej se Obeida “shërbeu si fytyra publike e organizatës terroriste Hamas” dhe “shpërndau propagandën e Hamasit”.
Gjithmonë i maskuar me një shall palestinez, ai u bë idhull për mbështetësit e Hamasit në të gjithë Lindjen e Mesme. Në atë që mund të ketë qenë fjalimi i tij i fundit të premten, Obeida tha se fati i pengjeve të mbetura izraelite do të ishte i njëjtë me atë të luftëtarëve të Hamasit, duke e paralajmëruar Izraelin kundër pushtimit të planifikuar të Qytetit të Gazës.
Ndërkohë, Katz paralajmëroi të dielën se shumë më tepër “partnerë kriminelë” të Obeidas do të jenë në shënjestër të “intensifikimit të fushatës në Gaza”, një referencë ndaj një plani izraelit të miratuar së fundmi për të marrë kontrollin e Gazës.
