Arratisje e pazakontë nga ambientet e brendshme të Gjykatës së Vlorës. Një i arrestuar në 2017-ën për kultivim kanabisi është arratisur këtë të mërkurë nga dritarja e katit të dytë të Gjykatës, ku kishte dalë për t’u njohur me dënimin.
I arratisuri është Mikel Kasa, 28-vjeç, ndaj të cilit rëndonte edhe një akuzë tjetër ajo e rrëmbimit të personit. Ai ka mundur t’u ikë forcave të policisë të cilat e kishin shoqëruar në Gjykatë.
I riu u arratis pasi gjyqtari lexoi vendimin
Kasa i ka shpëtuar bluve në momentin kur gjykatësi, Skënder Haluci, ka komunikuar dënimin ndaj tij me 3.4 vite burg, pasi përfitoi nga gjykimi i shkurtuar për shkak të qëndrimit të paraburgim. Atij i janë hequr prangat nga policia pas njohjes me dënimin, por pikërisht ky ka qenë momenti që ka sjellë arratisjen.
Salla e Gjykatës së Vlorës, me gjyqtar Skënder Halucin, nga ku u arratis i dënuari
Mësohet se dyert e gjykatës kanë qenë të hapura, çka ka ndihmuar 28-vjeçarin të realizojë planin e tij. Policia ka zbarkuar në terren me forca të shtuara për prangosjen e Mikel Kasës.
Policia kërkon ndihmë: I arratisuri i veshur me pantallona të zeza dhe bluzë rozë
Policia kërkon bashkëpunimin dhe ndihmesën e çdokujt që e sheh shtetasin e dënuar Mikel Kasaj, 29 vjeç, i cili ditën e sotme mundi të arratisej nga ambientet e Gjykatës Vlorë, të telefonojnë në numrin e telefonit 129. Ky shtetas në momentin e arratisjes ka pas veshur një palë pantallona të zeza dhe një bluzë rozë.
