Ministri i Mbrojtjes Niko Peleshi e relativizoi dëmin në ishullin e Sazanit pas katër ditësh në flakë që u shuan vetëm pas ndihmës nga ajri të shtetit grek.
Peleshi u shpreh se situate është zmadhuar kur sipas tij po ta shohësh nga lart e kupton që bëhet fjalë vetëm për një pjesë të vogël të ishullit që nuk ka lidhje me bazën.
“Dëmi në Sazan është zmadhuar më shumë se është në realitet. Se natyrisht kur shikon një foto në media me flakë mendon se është gjithë Sazani në flakë.
Nëse e shikon nga sipër bëhet fjalë për një fraksion shumë të vogël të një ishulli shumë të vogël. Nuk bëhet fjalë për bazën. Ra zjarr në një pjesë të ishullit të Sazanit, përgjithësisht me shkurre. Nuk ishte i gjithë ishulli në flakën”, tha Peleshi.
Nga ana tjetër deputeti socialist Xhemal Qefalia i doli në mbrojtje Peleshit duke e tepruar disi me krahasimet. Ai tha se Peleshi ka qëndruar në krye të detyrës për të shuar flakët kur të gjithë kanë qenë me pushime.
“Do ishte mirë që Salianji të ishte këtu i pranishëm. Tani kur ministri jep me detaje shpjegimet largohet. Ministri ka ardhur në seancën dëgjimore. Ka ardhur në interpelancë. Peleshi është vetë i pranishëm këtu. Thoni që nuk ka punuar vjet. Kolegët e kanë ndjekur situatën vjet. Vjet kur ne ishim me pushime ai ishte krah atyre që u morën për të fikur zjarret”, deklaroi ai.