Ish-kryeministri i Italisë, Romano Prodi, i cili vizitoi pak ditë më parë Shqipërinë ka fshikulluar kryeministrin Rama për qëndrimin e këtij të fundit ndaj Bashkimit Evropian.
Duke iu referuar “kërcënimeve” të kreut të qeverisë Rama në vizitën e tij të fundit në Bruksel, se nëse Shqipërisë nuk i hapen negociatat me Bashkimin Evropian, atëherë do t’i duhet të orientohet drejt Moskës, Prodi ka thënë se ky është një pretendim tërësisht i papërshtatshëm.
Në një intervistë të dhënë për mediat italiane, pas takimeve me krerët e shtetit në Shqipëri, ish-kryeministri italian thekson se deklaratat e Ramës nuk janë aspak në të mirë të vendit. Ndërsa pozicionimin e mundshëm drejt Lindjes e cilëson si një humbje për Shqipërinë dhe vendet e Ballkanit, po të kihet parasysh roli i Perëndimit ndaj trazirave të vitit 1997 dhe luftës në Kosovë.
Kur Prodi u pyet se si e gjykonte qëndrimin e kryeministrit Edi Rama se “nëse politikanët evropianë ngadalësojnë zgjerimin, Turqia, Rusia dhe Kina do të jenë në gjendje të ofrojnë perspektiva më të mira për vendet e zonës”, ish-kryeministri italian e cilësoi qëndrimin e kreut të qeverisë shqiptare si krejt të papërshtatshëm dhe se nuk duhet t’i mbajë sytë nga Moska apo të ëndërrojë Turqinë.
“Ballkani me siguri mund të shikojë drejt lindjes, por mendoj se nuk është i përshtatshëm për ta. Marrëdhëniet e mira me Turqinë janë të mira për të gjithë, por në bashkimin politik turko-shqiptar është pak ëndërr. Marrëdhëniet me Kinën janë gjithashtu të rëndësishme dhe pozitive, por brenda kufijve të caktuar, ato nuk duhet të ndajnë Evropën. Deklaratat e Ramës do të ishin lajm nëse ata do të ndiqeshin në mënyrë aktive”-theksoi Prodi.
Pak ditë më parë në vizitën e tij të fundit të kryeqytetin e Bashkimit Evropian, kryeministri Rama “kërcënoi” hapur Brukselin se është i gatshëm t’ia shesë shpirtin Rusisë dhe Kinës nëse Shqipëria nuk do të bëhet anëtare e Unionit. TIRANA TODAY
Tek linku mund të lexoni intervistën e plotë:
20 vjet pas 1997-ës/ Romano Prodi: Pakti italo-francez “çliroi” Shqipërinë (VIDEO)
