Ish – autorja e “Big Brother Albania”, Zefina Hasani ka reaguar për vdekjen që shokoi sot opinionin publik, atë të gazetares Adelajda Xhamani.
Përkrah ngushëllimit të ndjerë Hasani shkruan se Adelajda nuk duhej të kthehej në varrezat e Kavajë, në atë qytet që ajo donte me çdo kusht të largohej.
“Të më ndjejë dhe Adela nëse po flas më shumë se ç’ duhet në emër të saj, por me aq sa e kam parë ta dëshiroje Tiranën dhe jetën që po bënte këtu, me zor të madh e kam të besoj se ajo do të donte te kthehej sot në Kavajë,” shkruan Hasani.
Postimi i plotë:
Adela nuk duhej të kthehej sot ne Kavajë!
Të më ndjejnë familjarët e fisi i saj nëse po guxoj shumë, e po lajthis me këtë që po them, duke shkelur aty ku s’duhet, sidomos në një ditë të tillë, kur vdekja duhet respektuar siç e do zakoni i diktuar nga familjarët e të parët tanë. Por kam gjithë ditën, që po aq sa vdekja e Adelës, po më dhemb rikthimi i saj ne qytetin prej të cilit, në të gjallë të vet, ajo donte të largohej me çdo kusht.
Adela, vajza më e guximshme që ka njohur deri me sot Big Brother, që u përball me çdo paragjykim e gjykim, vetëm pse donte te ndryshonte jetën e saj, vajza që ia doli të vijë e të qëndrojë në Tiranë vetëm falë guximit, vendosmërisë e mencurisë së saj, gazetarja e re që i bëri vend vetes vetëm duke punuar, pa e shitur aspak bukurinë me të cilën mrekulloi një Shqipëri të tërë, mendoj se duhej të qëndronte përgjithmonë këtu në Tiranë.
Vdekja e mori kaq pabesisht sa s’pati kohë ta thoshte se ku do të donte të prehej.
Të më ndjejë dhe Adela nëse po flas më shumë se ç’ duhet në emër të saj, por me aq sa e kam parë ta dëshiroje Tiranën dhe jetën që po bënte këtu, me zor të madh e kam të besoj se ajo do të donte te kthehej sot në Kavajë.
Ajo duhej të respektohej të mbetej këtu në Tiranën që vetë e zgjodhi, pse jo dhe si simbolizimi i vajzës pa njohje e përkrahje, që sfidon gjithçka e vetme, pa u dorëzuar në asnjë rast.
Të më ndjejnë dhe miqtë e ngushtë që kanë qëndruar çdo ditë me të e që sigurisht e dijnë më saktë se ç është më e mirë për Adelen tani që ajo s është më. Qofsha gabim por nuk ndenjta dot pa e thënë këtë që po me dhemb fort, sot, në ditën e vdekjes që na lëndoi pa e ditur se e paskam dashur kaq fort atë vajzë.
Prindërit kanë të drejtën absolute ta kenë pranë vetes por Adela i përket Tiranës, që ditën kur mori rrugën drejt Big Brother, ku do të gjente portën e vetme për të hyrë në këtë qytet të madh.
