Teksa foli për aktualitetin politik në A2, Alfred Peza, Sekretar për Shoqërinë Civile dhe Mediat në PS, renditi tri arsyet se pse Partia Socialiste kërkon mandatin e tretë në zgjedhjet e 25 prillit të vitit të kaluar.
“Nuk është hera e para që Rama i ka bërë ndryshe fushatat dhe takimet publike apo ata që aspirojnë të bëhen pjesë e forcës sonë politike. E tillë ka qenë edhe zgjedhja e radhës dhe nuk ka asgjë të re. Freskimi i herë pas hershëm i ekipit bëhet për të dhënë energji të reja dhe për të sinkronizuar përvojat me energjitë rinore, mbi këtë bazë është bërë edhe fushata mbi deputetin që duam. Janë tri arsye thelbësore që PS kërkon një mandat të tretë. E para, ka të bëjë më vazhdimin, përfundimin, e të gjithë suportit që duhet të japë si mazhorancë në instalimin e sistemit të ri të drejtësisë dhe vendosjen e saj në shina të plotë, për aq sa i takon mazhorancës. E dyta, ka të bëjë me projektin e madh të rindërtimit pas tërmetit të madh të 26 nëntorit të vitit të kaluar. E treta, ka të bëjë me menaxhimin dhe rikuperimin e të gjitha pasojave në ekonomi të pandemisë globale, por edhe në aspektin shëndetësor”, u shpreh Peza.
Kur u pyet për inceneratorët dhe akuzat e ngritura nga Partia Demokratike, e cila i ka çuar në SPAK, Peza u shpreh se drejtësia duhet të thotë fjalën e saj për këtë çështje.
“Është në kulturën e të bërit politikë të PD-së, LSI-së dhe të opozitës jashtëparlamentare që ta bëjë në këtë mënyrë opozitarizmin e vetë, duke mos u sjellë si një grupim politik që ofron alternativa, programe dhe projekte zhvillimi. Është e njëjta mënyrë e të bërit opozitë, ku nuk merren çështjet dhe të shkojnë në institucionet përkatëse të drejtësisë. Përgjigjja e PS është dhënë. Për PS nuk ka asnjë problematikë të natyrës së pretenduar nga PD. Në një shtet të së drejtës, kur dy palë pretendojnë gjëra të kundërta për të njëjtën çështje, ka arbitër, që në këtë rast është drejtësia dhe le të lëmë drejtësinë të thotë fjalën e saj”, u shpreh Peza.
