Inspektori i Lartë i Drejtësisë z. Artur Metani, i shoqëruar nga një delegacion nga trupa inspektuese e ILD-së, zhvilloi një vizitë pune në Prishtinë, ku pati takime me drejtues të institucioneve të drejtësisë dhe trupën akademike të Fakultetit të Drejtësisë së Universitetit të Prishtinës.
Në takimin e zhvilluar me kryetarin e Gjykatës Supreme të Kosovës, z. Fejzullah Rexhepi dhe gjyqtarin e Gjykatës Supreme, z. Qerim Ademaj, Inspektori i Lartë i Drejtësisë z. Artur Metani u ndal si fillim tek roli dhe funksionet e Zyrës së Inspektorit të Lartë të Drejtësisë në lidhje me trajtimin e ankesave, hetimet disiplinore dhe inspektimet ndaj magjistratëve.
Kryetari i Gjykatës Supreme e informoi Inspektorin e Lartë të Drejtësisë rreth funksioneve të Gjykatës që drejton, si dhe kompetencën që Gjykata Supreme ka në trajtimin e ankesave të gjyqtarëve dhe prokurorëve në Kosovë, ndaj vendimeve të Komisioneve Disiplinore të Këshillave përkatës. Z. Metani dhe z. Rexhepi vlerësuan se ndërtimi dhe thellimi i marrëdhënieve profesionale mes dy institucioneve kontribuon në promovimin e standardeve etike dhe profesionale në sistemet e drejtësisë së dy vendeve.
Inspektori i Lartë i Drejtësisë dhe delegacioni që e shoqëronte zhvilloi një takim pune në Këshillin Gjyqësor të Kosovës, ku u mikprit nga kryesuesi i Këshillit Gjyqësor z. Albert Zogaj, zëvendëskryesuesja e këtij Këshilli znj. Arjeta Sadiku, kryetarja e Komisionit të Performancës së gjyqtarëve znj. Teuta Brahimi, si dhe drejtori i përgjithshëm i Sekretariatit të Këshillit Gjyqësor të Kosovës, z. Shkëlzen Maliqi.
Z. Metani e falenderoi z. Zogaj për pjesëmarrjen dhe angazhimin në konferencën rajonale të shërbimeve të inspektimit, që u mbajt në Tiranë në 25-26 shtator 2025, vlerësoi bashkëpunimin ndërinstitucional, duke theksuar rëndësinë e shkëmbimit të praktikave më të mira profesionale dhe të përvojave institucionale.
Duke vlerësuar si të shkëlqyer bashkëpunimin ndërinstitucional, Kryesuesi Zogaj e informoi Inspektorin e Lartë të Drejtësisë mbi zhvillimet brenda sistemit gjyqësor të Republikës së Kosovës, përfshirë proceset reformuese, avancimin e mekanizmave të llogaridhënies dhe integritetit, si dhe sfidat me të cilat përballet Këshilli Gjyqësor i Kosovës.
Të dy bashkëbiseduesit ranë dakord për intensifikimin e bashkëpunimit dhe zhvillimin e iniciativave të përbashkëta në të ardhmen, edhe përmes shkëmbimeve profesionale në institucionet respektive.
Një ndalesë e posaçme e vizitës së punës së Inspektorit të Lartë të Drejtësisë në Kosovë ishte në Fakultetin e Drejtësisë të Universitetit “Hasan Prishtina”, me të cilin ILD ka një marrëveshje bashkëpunimi, që në tetor të vitit 2022.
Në takimin me dekanin e Fakultetit të Drejtësisë z. Avni Puka dhe trupën akademike të këtij Fakulteti, u konsiderua si mjaft produktiv bashkëpunimi i deritanishëm, sidomos me vizitat studimore të studentëve të Fakultetit Juridik të Prishtinës në Zyrën e Inspektorit të Lartë të Drejtësisë dhe u hodhën ide për bashkëpunime në të ardhmen, si një trashëgimi e brezave, por edhe e konsolidimit të institucioneve të drejtësisë, pasi studentët e sotëm janë pjesa e ardhme e sistemit në Kosovë.
