Punimet për rikonstruksionin e rrugës “Mihal Komneno” 1.2 km në Berat e njohur ndryshe si rruga këmbësore për në Kalanë e Beratit, po avancojnë me ritme shumë të mira.
Siç njofton Fondi Shqiptar i Zhvillimit, aktualisht është kryer rreth 65 % e volumit të punimeve dhe puna vijon normalisht edhe në këto ditë pushimesh.
Ka përfunduar heqja e kalldrëmit ekzistues, vendosja e sistemit të kanalizimeve të ujërave të bardha dhe të ndotura dhe vendosja e linjave të elektro-telefonisë.
Ndërkohë vijon puna për shtrimin me kalldrëm, ndriçimin publik dhe elementët e tjerë plotësues të projektit.
Gjithashtu ka përfunduar edhe shtrimi me kalldrëm dhe sistemimi i pikës panoramike Tabja dhe sheshit përpara saj dhe së shpejti do të mbyllet edhe vendosja e sistemit të vrojtimit dhe punimet e gjelbërimit.
Parashikohet që muaji tetor 2018 të shënojë përfundimin e punimeve. Së shpejti pritet të fillojë puna edhe për rrugën Muzak Topia, e njohur si rruga automobilistike për në Kalanë e Beratit.
Ndërhyrjet janë pjesë e një pakete investimesh prej rreth 13.5 Milionë Euro, në kuadër të Projektit për Zhvillimin e Integruar dhe Turizmin, financuar nga qeveria shqiptare dhe Banka Botërore. Projekti zbatohet nga Fondi Shqiptar i Zhvillimit.
