Autori i dyshuar që qëlloi në drejtim të dy efektivëve mbrëmjen e së premtes në Vlorë, i ka shpëtuar një atentati në janar të këtij viti.
Diego Haxhiraj, i njohur edhe me emrat Teki Haxhiraj alias Diego Hanaj, është qëlluar me armë zjarri në lagjen Pavarësia më 5 janar dhe u plagos në dorë.
Atentati ndaj 2 efektivëve
Gjithashtu ai rezulton me precedent në fushën e lëndeve narkotike. Dy punonjësit e policisë, Angjelo Breshani dhe Nako Mehmetaj, të cilët ishin jashtë shërbimit, po udhëtonin me një Audi me xhama të zinj dhe pa targa kur u qëlluar me armë zjarri nga një automjet në lëvizje.
Dyshohet se ata u qëlluan nga 37 vjeçari për motive të dobëta, sipas policisë. Gjatë krehjes së zonës, shërbimet e Policisë gjetën të braktisur, në lagjen “Partizani”, Vlorë, automjetin tip “Volkswagen”, të përdorur nga autori i dyshuar i ngjarjes.
Njoftimi nga Policia Vlorë
Identifikohet dhe shpallet në kërkim autori i dyshuar i ngjarjes së ndodhur mbrëmjen e djeshme, i cili qëlloi me armë zjarri, për motive të dobëta, në drejtim të një automjeti me të cilin udhëtonin 2 shtetas (punonjës policie).
Sekuestrohet automjeti i autorit të dyshuar të ngjarjes.
Specialistët për Hetimin e Krimeve ndaj Personit dhe Pasurisë në DVP Vlorë, në vijim të punës për zbardhjen e plotë të ngjarjes së ndodhur mbrëmjen e djeshme, në lagjen “Partizani”, ku një shtetas qëlloi me armë zjarri nga një automjet tip “Volkswagen”, në drejtim të një automjeti “Audi”, më të cilin udhëtonin 2 punonjës policie, jashtë shërbimit, bënë identifikimin dhe shpalljen në kërkim të autorit të dyshuar të ngjarjes, shtetasit:
D. H. alias T. H. alias D. H., 37 vjeç, banues në Vlorë.
Ky shtetas, rreth orës 19:40 të mbrëmjes së djeshme, duke drejtuar automjetin tip “Volkswagen”, dyshohet se për motive të dobëta, ka qëlluar me armë zjarri në drejtim të automjetit tip “Audi”, me të cilin udhëtonin shtetasit A. B., 25 vjeç, me detyrë punonjës i Patrullës së Përgjithshme në Komisariatin e Policisë Vlorë dhe N. M., 27 vjeç, me detyrë punonjës i Policisë Kufitare Sarandë, të cilët nuk kanë pësuar dëmtime.
Gjatë krehjes së zonës, shërbimet e Policisë gjetën të braktisur, në lagjen “Partizani”, Vlorë, automjetin e autorit të dyshuar të ngjarjes. Vijon puna për kapjen e tij dhe për dokumentimin e plotë të rrethanave të kësaj ngjarjeje.
Materialet iu referuan Prokurorisë pranë Gjykatës së Shkallës së Parë Vlorë, për veprat penale “Vrasja në rrethana të tjera cilësuese”, kundër dy ose më shumë personave, mbetur në tentativë dhe “Mbajtja pa leje e armëve dhe e municionit luftarak”.
