Autoritetet belge dhe ato shqiptare e kanë të kërkuar për dy vrasje të ndodhura në vitin 2022, megjithatë nga verifikimet e kryera, Kevin Suçi, i njohur edhe me mbiemrin Zeneli, rezulton se ka dalë jashtë vendit në vitin 2017, 5 vjet më parë.
Vetëm 23 vjeç, ai implikohet nga dëshmia e dy vëllezërve Beqiraj si vrasës me pagesë për llogari të Kasandër Nogës. Të njëjtat të dhëna sugjeron edhe letërporosia e autoriteteve belge që thotë se në Qershor të 2022 ai ka marrë pjesën në tentativën e vrasjes ndaj Erion Hasanbelliut në Belgjikë.
Hetimet e Prokurorisë së Durrësit gjatë këtyre javëve, treguan gjithashtu se në vitin 2021, Kevin Suçi ka lidhur martesë fiktive me një vajzë pa konsensusin e saj dhe ka marrë mbiemrin Zeneli, sipas hetuesve me qëllim fshehjen nga autoritetet.
Që prej vitit 2021, sipas të dhënave të siguruara nga Tv Klan, Prokuroria në Durrës është duke e hetuar të riun në bazë të kallëzimit të nënës së vajzës.
Teksa Kevin Suçi Zeneli prej Tetorit kur u finalizua operacioni që çoi në pranga 14 persona si të lidhur me vrasje dhe ngjarje të tjera me pagesë, ka humbur gjurmët, Prokuroria ka hapur dosjet e vjetra për të dhe po verifikon tentativat e tij për t’iu fshehur drejtësisë.
