Deputetja socialiste Luljeta Bozo ka folur sot për situatën në të cilët ndodhet vendi ynë sot. Sipas saj kriza ekonomike që ka kapur vendin kalohet me solidaritet dhe jo me ulje taksash. Bozo tha se qytetarët duhet të solidarizohen me situatën, të kuptojnë se kriza e rritjes së çmimeve ka prekur të gjithë botën. “Duhet të sensibilizohen njerëzit, se sytë në ballë i kanë… ata shkojnë përditë që blejnë dhe menjëherë sinjalizojnë, të vijnë grupet, të kontrollojnë dhe të marrin masa. Kjo është situatë e jashtëzakonshme”, tha ajo.
Duke folur për pensionet, inxhinierja thotë se shtesa prej 3.000 lekësh e llogaritur si subvencion për përballimin e rritjes së çmimeve për produktet e shportës, është llogaritur dhe në bazë të inflacionit. Sipas saj, tani që për pagat nën 40.000 lekë janë hequr tatimet, në vitet në vijim do të rriten sigurimet dhe për pasojë dhe pensionet.
E pyetur nëse heqja e TVSH-së është e nevojshme për të sjellë uljen e çmimeve për produktet e shportës dhe të hidrokarbureve, Bozo thotë se nuk do të ndikonte. “Ulja e TVSH-së për konsumatorin nuk ka asnjë rezultat. Shteti subvencionon 80% të energjisë, të asaj që ne paguajmë në shtëpi, po nga t’i nxjerrë këto lekë shteti”, tha Bozo. Gjithashtu ka thënë se shërbimet për qeveritarët janë reduktuar, megjithatë duhen shqyrtuar shërbime të tilla luksi në një kohë krize.
