Gjykata Posaçme ka marrë vendimin për të konfiskuar 31 pasuritë e Moisi Habilajt.
Vlera e tyre mësohet se shkon afro 82 milionë lekë. Pasuria e tij ishte e vendosur në emër të familjarëve të tij. 10 apartamente, 4 ndërtesa, 6 makina, 1garazh, truall, e mijëra euro të tjera pasuri.
Një muaj më parë, GJKKO ka vendosur dënimin me 37 vite burg në total për grupin e Habilajve, të akuzuar për trafik narkotikësh dhe grup të strukturuar kriminal. Me 10 vite burg, Gjykata e Kundër Krimit dhe Korrupsionit të Organizuar ka dënuar Moisi Habilajn i cilësuar si kreu i grupit kriminal.
Habilaj është shpallur fajtor për veprat penale “trafikim i lëndëve narkotike e mbetur në tentativë e kryer në formën e grupit të strukturuar kriminal, për të cilën është dënuar me 12 vite burg, si dhe grup të strukturuar kriminal, ku është dënuar me 4 vite.
Me uljen e dënimit sipas kodit të procedurës penale, Habilaj është dënuar përfundimisht me 10 vite burg. Fajtorë për të njëjtat akuza, janë shpallur edhe Nazer Seiti, Maridian Sulaj dhe Fatmir Minaj, të cilët me uljen e dënimit janë dënuar përfundimisht me nga 9 vite burg.
SPAK kërkoi 63 vite burg, nga të cilët 18 vetëm për Moisi Habilajn, por katër pjesëtarët e grupit përfituan ulje nga gjykimi i shkurtuar.
Moisi Habilaj ndodhet në arrati, pasi u largua nga banesa e tij në Itali ku qëndronte në arrest shtëpie pas periudhës së festave. Gjykata e Apelit në Katania e dënoi me 15 vite burg Moisi Habilajn duke lenë në fuqi vendimin e shkallës së parë. Që prej fundit të majit, ai ishte në arrest shtëpie pas qëndrimit në burg për gati dy vite.
Moisi Habilaj u dënua qershorin e kaluar me akuzën e trafikut të drogës nga Shqipëria në Itali, ndërsa pak muaj më parë Apeli e la në fuqi. Grupi kryente trafikun e drogës kryesisht nga deti me anë të peshkarexhave.
