Një histori se si nga ferri dhe tuneli më i errët mund të shohësh dritë dhe një mesazh i fortë për jetën, me plot mësime.
Është historia e Nicole Smith, 27-vjecares lindur në Londër dhe rezidente në Montebelluna, e cila pësoi një aksident të rëndë, kur në timon ishte shoku i saj, shqiptari 25-vjecar Eduard Koroni.
Gjithcka ndodhi natën e 22 gushtit 2016, kur makina e drejtuar nga shqiptari në ndikimin e alkoolit dhe një miksi drogash që kishte marrë, doli nga rruga dhe u përplasën keq, raportojne media italiane.
Vajza përfundoi në koma të gjatë, nga e cila u zgjua për fat, por kaloi në spital muaj të gjatë trajtimi deri sa arriti të merrte veten.
Pas zgjimit ajo tregon se nuk mbante mend gjë dhe pa rreth e rreth vetëm mjekë dhe infermierë. Vajza që studion Shkenca Komunikimi në La Sapienza në Romë tregon se para saj kishte dy rrugë: “Urrejtja ndaj atij që ta bëri këtë, ose të ngrihesh, pasi jeta është shumë e bukur”, raporton “Panorama”.
Ajo tregon se nuk kanë qenë muaj të lehtë ato që kaloi, por thotë se “edhe në tunelin më të errët e më të zi ka dritë në fund. Është drita e faljes, e miqësisë, e dëshirës për jetën dhe falja. Po unë e fala Eduardin, djalin që ishte në timon”-thotë ajo.
Ajo tregon edhe takimin e parë me të, pas disa muajsh dhe thekson se ai ka qarë dhe i ka kërkuar falje.
“Mes nesh pati një përqafim të gjatë dhe i thashë se e fala. Kjo përvojë e ka ndryshuar edhe atë, që ishte në timon nën ndikimin e drogës dhe alkoolit, ai tani është më i përgjegjshëm për vetë dhe për tjetrin krah tij”- thotë ajo.