Fitorja në derbin ndaj Interit në Kupën e Italisë duket se ka rikthyer qetësinë te Milani dhe mund ti japë një tjetër shtysë sezonit të vështirë që po kalojnë kuqezinjtë. Në ditët e fundit pas shumë rezultateve negative të njëpasnjëshme ishte folur për një lamtumirë të mundshme të kapitenit Leonardo Bonucci në merkaton e janarit.
Chelsea dhe akoma më shumë, Manchester City i Pep Guardiolës kanë shfaqur interes për lojtarin, megjithatë Lucci, agjenti i mbrojtësit në një intervistë për mediat italiane ka përjashtuar çdo opsion që Bonucci mund të largohet nga Milani në janar. “Leo është një lojtar i Milanit, ka zgjedhur kuqezinjtë dhe do të vazhdojë përpara pasi ky është objektivi i tij”, deklaroi menaxheri i 30-vjeçarit italian.