Revista prestigjioze Forbes ka publikuar sot për herë të 7-të listën “Forbes 30”, në të cilën prezantohen imazhet e 30 të rinjve që janë lider në inovacion, duke ndërtuar sipërmarrje që kanë transformuar botën e biznesit apo shoqërinë në vendet prej nga vijnë.
Mes emrave në listë renditet dhe i riu shqiptar Dean Çelaj, i cili në vitin 2019 krijoi websait-in “Akademi.al”, në një përpjekje për të përmirësuar dhe sjell inovacion në mënyrën e mësimdhënies në Shqipëri.
Çelaj nuk është një emër i panjohur për publikun pasi në 2021, ish-ministrja e Arsimit, Besa Shahini në një postim në Facebook, e prezantoi atë si krijuesin e platformës, ku nxënësit arritën të mësonin falas leksione të matematikës dhe shkencave.
Dean Çelaj ka mbaruar studimet në “University College London” me bursë nga “Fondi i Ekselencës” nga Ministria e Arsimit, Sportit dhe Rinisë (MASR), ndërkohë që platforma e krijuar prej tij ishte “shpëtimtare” për nxënësit, mësuesit dhe prindërit gjatë periudhës së pandemisë “Covid-19”.
Në kohën kur pandemia u ul këmbëkryq në vend, Akademi.al firmosi kontrata me qeveritë e Shqipërisë, Kosovës dhe Maqedonisë së Veriut për t’u bërë e para platformë e mësimit në distancë, me mbi 545,000 përdorues dhe rreth 23,000 video të mësimdhënies në gjuhën shqipe.
Sipas Forbestë renditurit në listën e “Forbes 30 Under 30 Europe”, kanë arritur të grumbullojnë të gjithë bashkë një shumë prej 2 milion dollarësh në investime për projektet e tyre, shifër kjo dyfish më e lartë se viti i kaluar.
Ndërkohë në platformën e drejtuar prej tij thuhet: “Ne synojmë të edukojmë çdo individ, kryesisht studentë me metodat tona interaktive, duke sjellë shkollën më pranë jush. Të nxisim këdo, pavarësisht moshës, për të marrë dije në çdo moment kudo që ndodhen”
